Старт новага навучальнага года
01.09.2017
1 верасня ў нашай установе прайшла ўрачыстая лінейка, прысвечаная святу першага званка. Ганаровае права зайсці на лінейку пад апладысменты вучняў і настаўнікаў, бацькоў і гасцей атрымалі вучні выпускнога 11 класа і самыя маленькія жыхары вялікай школьнай сям'і - першакласнікі - разам са сваімі класнымі кіраўнікамі Жалезнай В.Р. і Арэшка І.У. Адзінаццацікласнікі Кавалька Сяргей і Занька Юліяна пад гукі Дзяржаўнага гімна ўзнялі Дзяржаўны сцяг Рэспублікі Беларусь. З прывітальнымі словамі да прысутных выступілі дырэктар ДУА "Люсінскі дзіцячы сад - сярэдняя школа імя Якуба Коласа" Зялёнка В.В., старшыня Люсінскага сельвыканкама Шкут В.А., спецыяліст ААТ "Люсіна-Агра" Яська Т.У., ад імя бацькоў - Амельяновіч Л.А. З вуснаў першакласнікаў прагучалі вершы, прысвечаныя школе. Парады малодшым школьным сябрам далі ў сваіх выступленнях вучні 11 класа. Настаўніца 2 класа Жалезная Л.У. перадала сімвалічны ключ першакласніка ў рукі Арэшка І.У., якая павядзе сваіх вучняў па сцяжынках школьнага жыцця. Дырэктар школы Зялёнка В.В. уручыла шэрагу вучням граматы і дыпломы за дасягнутыя поспехі ў вучобе, спорце, грамадскай дзейнасці. Ну і вядома, як на свяце без песень: перад прысутнымі з вакальнымі нумарамі выступілі сёстры Ірына і Кацярына Наумік, а таксама Ірына Агалец. І, бадай, самы важны момант лінейкі - першы школьны званок. Старт новаму навучальнаму году дадзены. У добры шлях па краіне ведаў!
А.Ю.Рылка,
намеснік дырэктара
па асноўнай дзейнасці
ФОТАРЭПАРТАЖ