Аповесць "У палескай глушы"
"Аповесць "У палескай глушы", як і ўся Коласава трылогія "На ростанях", - твор глыбока аўтабіяграфічны, таму не дзіўна, што і яе персанажы ўспрымаюцца адпаведна - рэальнымі, жывымі людзьмі... У гэтых дзвюх палескіх вёсках - рэальным Люсіне і літаратурным Цельшыне ўсё так пераплялося і знітавалася, што не ўзнікае нават і думкі адрозніваць люсінскага настаўніка Канстанціна Міхайлавіча і кніжнага Андрэя Лабановіча, каравокую стройную Ядвісю, па якой і сёння журыцца Палескі край, і рамантычную, дзёрзкую Ядвісю, якая напаследак перад ад'ездам вырывае дзікую грушку каля школы." (Віктар Гардзей. "Люсінская легенда. Па сцежках Якуба Коласа")
У 2023 годзе споўнілася 90 гадоў з таго часу, калі выйшла ў свет у Вільні першая аповесць з трылогіі Якуба Коласа «На ростанях» - "У палескай глушы". За гэты час аб выдатным творы напісаны шэраг артыкулаў, публікацый, даследванняў, раскрыты яго багаты змест, ацэнены мастацкія вартасці. Але цікавасць да коласаўскага твора не змяншаецца. Кожнае новае пакаленне адкрывае ў палескіх аповесцях штосьці сваё, раней не заўважанае або належным чынам не ацэненае. Такі лёс вялікіх эпахальных твораў.
Прачытаць аповесць "У палескай глушы" можна на сайце "Беларуская палічка" (Беларуская электронная бібліятэка) па гэтай спасылцы.