Сцежкай Коласа
18.09.2021
Да захавання памяці пра Якуба Коласа з трапятаннем ставяцца не толькі там, дзе нарадзіўся пісьменнік, але і ў тых месцах, дзе жыў і працаваў класік беларускай літаратуры. Не выключэнне і наша вёска Люсіна. Доказам таму – музей Якуба Коласа ў нашай школе, памятны знак на месцы, дзе стаяла першая школа, у якой працаваў настаўнікам будучы народны паэт. Сцежкі ў гэтыя мясціны не зарастаюць. Музей жыве наведвальнікамі, урокамі, тэатральнымі пастаноўкамі, выхаваўчымі мерапрыемствамі. Поўніцца вершамі і народнымі песнямі.
Членамі савета музея створаны турыстычны маршрут па месцах, якія Якуб Колас апісаў у аповесці “У палескай глушы”. Маршрут так проста і называецца “Сцежкай Якуба Коласа”. Адным з пунктаў з’яўляецца памятны знак на месцы былой школы, у якой распачаў сваю дзейнасць малады настаўнік. Гэта быў вялікі камень з шыльдачкай. Упершыню знак быў усталяваны ў 2002 годзе да 120-годдзя з дня нараджэння Якуба Коласа. Сёння ён мае іншы выгляд: вялікая разгорнутая кніга на пастаменце з партрэтам Якуба Коласа і залатым надпісам “На гэтым месцы знаходзілася школа, ў якой у 1902 – 1904 гадах працаваў настаўнікам народны паэт Беларусі Якуб Колас”. І гэта не проста знак. Дзеці прыходзяць сюды, каб яшчэ раз успомніць гісторыю.
І гэта сімвалічна, што менавіта ў Год народнага адзінства ў нас адбываюцца змены. Мы шануем свае традыцыі, культуру, гісторыю, і, маючы такую спадчыну, можам называцца народам.
Н.А. Антыкала,
настаўнік беларускай мовы і літаратуры